寫實小說–律師行

spreadspark

11.

我接過手頭上嘅文件，估唔到我係麥黃張律師樓嘅第一份工作，就係做逆權侵佔。

逆權侵佔，係指房地產非業主不經原業主同意，持續佔用對方土地超過一定時限，原業主訴訟時間終止，佔用者可以成為土地嘅合法新業主，不必付出任何代價。逆權侵佔嘅案例，亦都係麥黃張律師樓最經常接到嘅生意。

逆權侵佔要符合敵意佔有嘅要素，如果佔有者相信業主容許佢合法進入該地，咁佔有意圖就唔成立。

12.

所謂逆權侵佔，一般時效為12年，零五年嗰時，有一單好出名嘅新聞，就是說一對母女持續佔用大埔一片農地超過20年，結果得到該地段業權，個地原本屬於恆基地產，就係因為逆權侵佔，所以判咗個兩母女勝訴。

麥黃張律師樓有一間好大嘅房，間房仲大過老細房，入邊全部都係60幾年來，麥黃張律師樓接過的案例，亦係我長期打躉嘅地方。

我做晒所有資料蒐集，判我哋勝訴嘅機會好大，麥黃張律師樓嘅風格一向都穩打穩扎，稍微有少少錢，但又想贏官司嘅，都會搵我地。

我做晒功課，將啲嘢交咗比麥律師，麥律師望咗一眼，「你覺得你咁樣做嘢，就可以繼續留喺我哋麥黃張律師樓咩？」

13.

我好驚，我唔知自己做錯啲乜嘢，麥律師一手將文件俾返我。

「你連你個客都冇見過，你點有資格做律師，我點可以俾你代表我地麥黃張律師樓。」

我又驚又喜，估唔到我有機會可以跟到客人，我即刻出返去，準備見客嘅功夫。

今次嘅按例非常典型，一戶姓李嘅家人，上一代嘅時候將間屋借咗俾一個冇屋住嘅親戚，個親戚一路住到而家，到上一代都死埋啦，佢哋嘅仔女先發現原來嗰間屋原本係屬於自己爸爸嘅，咁就想收返間屋，但個親戚就用逆權侵佔嘅方法，想得到依間屋嘅擁有權。今次嘅任務，就係將間屋收返返嚟。

14.

我去到李氏嘅屋企，佢屋企住喺赤柱嗰啲獨立屋，有司機有管家，我嚟到，坐咗喺佢哋個好靚嘅大廳度，個管家打咗個內線電話

「麥黃張律師樓嘅人到咗」

等左一陣，出嚟嘅人係一個年約30歲嘅男人，典型嘅有錢佬樣，佢一見到我，就皺唒眉頭，「乜而家麥黃張律師樓搵啲咁嘅人黎見我」

佢就好似電視入邊典型嘅有錢人一樣，完全睇唔起人，但當然，我都唔敢得罪佢。

「其實我今日嚟到，都係代表返麥黃張律師樓，補問你小小問題」

佢點起左支雪茄，「問啦。」

15.

「其實係呢件事情上面，你有冇諗過用和解嘅方法解決呢？」

「屌你老母，我要和解嘅方式解決，洗撚搵你麥黃張？」

我保持冷靜，繼續問：「咁你有冇一個急切嘅需要，需要即刻收返個業權？」

李氏：「呢個乜撚嘢問題嚟㗎 ，我唔係要即刻收返，唔通等我死咗之後先收返啊？」

「如果你有急切嘅需要，我哋要話返比法官聽啫」

「總之我唔理，我就要收返嗰間屋，嗰間屋原本係我㗎嘛」

我當下心諗起一句名句，你唔理，你睇下我會唔會理？但我把口當然講「明嘅明嘅」。

聽到左一陣之後，我就帶着一肚怒氣離開間屋。

16.

講到尾，李氏都不過係想收返間屋，之後間佢做劏房，我返返去麥黃張律師樓，同麥律師彙報返情況。

「咁既然佢唔願意接受和解，咁我哋出律師信俾佢親戚囉。」

我鼓起勇氣，「麥律師，我查過佢親戚情況，佢哋經濟環境好差，絕對負擔唔到現時出面嘅租金，如果收返間屋，佢哋就會冇地方住不如等我再去多次搵李氏……」

麥律師打斷我嘅說話「細路，我知道你想講咩，但你要清楚，李先生先係我哋麥黃張嘅客人，我哋嘅責任，就只係幫佢贏官司，得到佢想要嘅結果。」

我冇出聲，然後離開咗間房。

17.

我一早預咗有一日，有利益嘅地方就有衝突，我準備好晒上庭嘅文件，一早到咗法庭，結果嗰間親戚根本都冇出現，我哋自動勝訴，李氏大力拍打我嘅膊頭「你哋哋麥黃張做嘢一向都令我咁放心」。做完嘢之後我就返返去麥黃張律師樓，麥律師唔喺度，以佢咁多年經驗，一早估到有咁嘅結果。

一直去到收工，麥律師都冇返到黎，佢好少全日都唔係律師樓，但佢去咗邊度，我當然冇權過問。直到第日，我收到個家親戚嘅一個電話。

18.

「請問係唔係麥黃張律師行？」

「係。」

「麥律師喺唔喺度啊？」

「佢行開咗，你邊位搵佢？」

「冇，我打個電話來純粹想多謝佢幫我同我個仔搵到一間好好嘅房住，地方係細啲，但都總好過無屋住，你哋麥黃張啲人真係好，我有機會同需要，都會叫啲朋友搵你地幫手。」

原來，麥律師琴日全日唔係公司，就係出咗去幫嗰家冇屋住嘅人搵屋。

麥律師返到公司，我同佢講返，嗰家人打過電話嚟多謝佢，佢無講嘢，淨係叫我出返去做嘢。

19.

我突然之間明白，法律只係法律，有時候法律甚至只係企係有錢人嗰邊，好似我咁乜都唔識嘅話，就會覺得法律好唔好公平，其實，只要唔傷害人嘅話，我哋每個人都可以用自己嘅方法去履行我哋心中嘅正義。

我真係好開心可以入到麥黃張度做嘢，跟到麥律師學嘢。

我一路做一路學，做做下就咁就過咗半年，去到最後尾嗰日，我大膽咁問麥律師，「畢咗業之後，我可唔可以返嚟麥黃張做嘢？」

麥律師望都無望過我一眼，「睇下到時點。」

佢一如既往都係咁串，咁冷漠，但我鍾意。

我返到去學校，有啲精英同學就去咗香港最top嘅律師樓度做嘢，但我都好自豪咁同人哋講，我去咗麥黃張度做野，跟過一兩個個案。

大家都好愕然，竟然有律師樓俾新人去跟個案做，仲要係學生、實習生。